對小弟而言，當年出走韓國最大嘅得著，笨唔係講到好高尚，去享受異地生活，更加唔係別人口中，逃避什麼現實生活嘅殘酷(唔見得韓國人生活比香港人輕鬆)，而係俾一個機會知道自己最大嘅Fear係咩？(老土啲姐係了解自己更多)自己究竟想要咩？(自問以前係一個，比起井入面隻青蛙一伸條死人脷出嚟，「及」一聲食鬼咗果隻蚊，還要細小嘅微生物。當時只係知自己唔想要咩，從來唔會諗多一步，究竟自己想點）而係外地生活，基本上每日都會問自己至少一次：(what the x i'm doing right here?ㅋㅋㅋ)
好彩～我覺得自己真係好彩！起碼我可以大聲話俾人知，由細到大，我有一個無辦法成日見，但佢會不時主動點醒我嘅好兄弟— 偽文豪 細個果陣，佢會夜晚打電話同我講：「喂～老老實實，你今日踢波遲到播，你諗下等果個有咩感受」；大個咗，我問佢做人嘅意義係咩？佢同我講：「每個人答案都唔一樣，從來無model answer，唔係考死人會考背答案，每個人都會有自己人生嘅命題」；到我出發去韓國前夕，心靈上有百般嘅放唔低，佢話：「你問自己想要咩？活到咁大個人，有無一樣野係真係自己想做而唔係人地安排你去做架呢？如果想，就做！重要堅持到最後，就好似我玩巴西柔術一樣，堅持是力！」
(一講起巴柔，我睇過佢比賽一次咁大巴，我記得隔離場有個選手，睇住佢被人用腳鎖鎖斷隻手大叫：呀～～呀～～無錯！真係痛到分兩段叫出嚟。。。果下我睇到好似自己被人鎖斷咗咁痛>< 小弟都係打返籃球把啦 哈哈) anyway老兄，多謝你！
▌朋友阿澧同佢女友喺泰國開咗間Cafe，佢哋一星期做足7日，一日瞓得4粒鐘。前幾日，佢喺FB同我傾偈，話佢女友喺鋪頭洗洗下碗，突然間喊，仲同佢講：「唔明點解我一個女仔，要做得咁辛苦。」
阿澧突然間同我吐苦水，我先諗起，佢呢條友，真係好L捱得……
阿澧用咗幾年學韓文，再用一年儲錢去韓國Working Holiday。佢為咗儲錢，星期一至五返滅蟲公司做打雜Marketing，放工返誠哥間超市搬貨，星期六日做各式各樣Freelance，地盤都做過；試過喺四十幾樓高空工作，啲師傅同佢講，一定要戴頭盔，因為地盤要隔幾層先有廁所，好多工友都會喺高空表演排便，真係會痾咗篤落你頭度。
去到韓國讀韓文，錢唔夠，落腳最平嘅「考試院」(類似劏房)，據說間房細到篋都放唔到。為咗慳，佢幾個月一日三餐都食泡菜+白飯。嗰年幾兩年，佢由190磅捱到得返160磅。親友嚟探佢，佢話自己特登減肥扮韓星。
之後佢識到泰國女友，讀完韓文後，就返咗香港8個月，計劃儲夠錢過泰國發展兼同女友生活。去到泰國，讀咗8個月泰文，喺泰國做咗排嘢，唔係幾順利，又返韓國，本來做得唔錯，但佢唔鍾意做Sales，而剛好有朋友間公司請人，就又返返泰國，點知間公司請咗佢又壓佢價、扣佢稅、拖佢簽證……
阿澧話，呢幾年嘅自己好似喺個海度飄流，次次捉到樹枝以為係求生繩索，點知全部都係水蛇。
我問：「發生咁多事，有冇諗過返香港打份牛工就算？」佢話，最大嘅魔鬼係佢啲親友。好多時啲親友會同佢講：「你搞唔掂咪返嚟囉！」
阿澧話，唔知點解，愈係聽到呢啲說話，佢愈係逼自己死都唔可以放棄。呢幾年我哋都有來往，我好好奇，我有冇講過類似嘅嘢？我問返佢，佢話：「你同我講，話你信我，話我一定搞得掂，我覺得你真係畀到我力量。」
喺外地體驗生活，係佢嘅夢想，而且佢知佢女友一定唔適應香港生活，所以佢先甘願捱咁多苦。最後佢同女友傾過，決定一齊落手落腳開間貨櫃屋Café。間嘢開咗兩個月，生意算幾好，問題只係未請到人，一星期要踩足六日，休息嗰日都仲要洗嘢。
就喺今個禮拜休息洗嘢嗰日，佢女友終於忍唔住崩潰，兩人吵咗幾句。
我有啲擔心，同佢講：「你女友肯同你捱，已經好偉大，你諗下，你咁捱得都覺得辛苦，佢一定已超過佢捱到嘅極限。」
幾個鐘頭後佢覆返我，佢話女友喊完笑返冇晒事，仲一齊搭緊車去按摩店按摩，佢話，呢個係佢哋整個星期最爽皮嘅活動。
嗱，阿澧，我想同你講，我好少同人講「你掂架」，我係真係覺得你掂先咁講的，須知道，對住心智不堅嘅人話佢掂，分分鐘害死人。我一直覺得，單純係一種力量，而你同你女友，都有呢種單純力，因此我喺呢度再講一次，你哋會愈來愈好的，加油吧！
▌哀傷戰記(4)
「單純力」
去開泰國請幫襯下，內有地址 ： 人在泰 香港仔日記
Search